البن خلص …. بقلم مها عامر
أم العيال: أبو العيال البن خلص من مده ومكنتش راضيه اقولك إلا لما تقبض ولما جربنا نطحن نوى البلح مطلعش حلو
أبو العيال: شيلاه يا قبض هو القبض هيكفي إيه ولا إيه أنا عايز أقبض فى الشهر تلت أو أربع مرات على الأسعار دي بس هجيب البن كده كده
أم العيال: والله ظلمنا اللي بيبعوا البن وفكرنا انه نوى بلح لكن طلع طعمه غير كده
أبو العيال:طيب ما تجربي نوى المشمش
أم العيال:صحيح كنت هنسى لسه الفسيخ
أبو العيال: مش انتي أكلتيه فى العيد وتعبتي والضغط عِلى
أم العيال:ولو مأكلتوش الضغط هيعلى برده أنا هاكله ورزقي على الله
أبو العيال: وأنا هاكل إيه فى اليوم ده
أم العيال:زي كل سنه تونه وتعصر عليها لمونه
أبو العيال: عايزه حاجه تانيه غير الفسيخ
أم العيال:أكيد طبعا هعوز
حلويات وحاجه ساقعه عشان نحلي
أبو العيال:يعني الوقتي مش همك الضغط ولا الأملاح
أم العيال: قلبك أبيض مجتش على يوم
أبو العيال:أنا بفكر أسافر
أم العيال:ياريت يا أبو العيال عشان نصرف أحسن نفسنا نجرب الأخضر
أبو العيال:عايزه سمك أخضر؟!
