بقلم _ مها عامر
أم العيال:إيه رأيك فى البسكوت اللي أنا عملته بتاكل كده من غير ما تتكلم
أبو العيال:ما أنا طالما باكل يبقي عجبني أكيد
أم العيال:وفيها إيه لما تقول كلمه حلوه ده إحنا حتى فى العيد
أبو العيال:والله خايف أقول عشان هتبقي عايزه تعمليه كل عيد
أم العيال:لأ هو إنت متعرفش أنا كده كده هعمل قولت أو ماقولتش
أبو العيال:أومال ليه بتسألينى
أم العيال:أهو فاضيه قولت أتسلَى
أبو العيال:تتسلي عندك يختي الترمس فى المطبخ
أم العيال:طيب روح هات لينا شويه
أبو العيال:يا هاني هات طبق ترمس ومعاه شويه بسكوت يا هنيه اعملي شاي يبقى حلو مع البسكوتهو ليه محدش بيرد ؟!
أم العيال:ما انا قولتلك كل واحد حاطط السماعات فى ودانه ولا حد هيسمعك قوم إنت
أبو العيال:طيب ما تقومي إنتي
أم العيال:أنا اللي تعبانه فى الشقه والطبيخ طول النهار والتنضيف مستكتر عليا أرتاح فى العيد وأحس براحه مش كفايه لا بنروح ولا بنيجي
أبو العيال:أنا هشتري سماعات من بكره ومحدش أحسن من حد
التعليقات مغلقة.