أم العيال: صباح الخير يا أبو العيال بقولك هات الفول من المكان اللي انت بتجيب منه أما الطعمية هاتها من مكان تاني
أبو العيال: صباح النور وليه خوته الدماغ دي يا أم العيال أنا هجبهم مره واحده وأخلص
أم العيال: تخلص من إيه ما هي هي هات الفول وبعدين انزل هات الطعميه عشان مينفعش تروح بيها
أبو العيال: يعني مش هي هي كده مشوارين
أم العيال: تروح مشوارين ولا ناكل طعميه وحشه؟؟
أبو العيال: اروح وأمري لله
أم العيال: هو ليه محسسني انك رايح تحارب
أبو العيال: والله أنا بحارب كل يوم ولا حد منكم حاسس بحاجه
أم العيال: خلي بالك المره اللي فاتت البياع منه لله ادالك البلح الزعلول كله بايظ الله يكون فى عونك تلاقيك كنت مشغول فى ساحه القتال
أبو العيال: طلباتك ايه النهارده؟!
أم العيال: طلباتي قصدك طلبات البيت أما طلباتي انا مفيش حد بيجيبها
أبو العيال: يا هنيه اعمليلي يا بنتي كوبايه شاي تقيله لأحسن صدعت ولسه هصدع
أم العيال: انت لسه هتشرب شاي قوم لأحسن تتأخر عن الحرب
أبو العيال: ما أنا فى الحرب اهو
أم العيال: عايزه خضره شبت وبقدونس عشان هعمل كفته وبطاطس وعيش فينو عشان السندوتشات
أبو العيال: تعرفي كان نفسي فى الاكله دي
أم العيال: مقولتش ليه عشان نعملها
أبو العيال: كنت مفكر اللحمه المفرومه خلصت معرفش أن لسه فيه
