للشاعر : شريف رستم – نُكته – من زمن الكورونا

.. واحنا في زمن الكورونا  :

شُفنا – ناس –  بيشَمبَرونا

وسمِعنا عن ناس .. كشمَرونا

واتلسَعنا ..

مِن ناس – خَدو صوتنا – وزنبقونا

واتوَجعنا ..

مِن ناس .. في ضِلّ ناس – شنْفرونا

واترَقعنا ألف كف ..

في زمن لِسّاه ماكَفّ

بمسؤولين – بيخربأونا

تُهنا مِنّا ..

واللي باقي فينا ..

حاولوا – يفوّقونا – بعترونا

ماعدتش فارقه ..

شرشحَه في الفَن – أو  نحنحَة إعلام

ماعدتش فارقه ..

السَرْمحَه – والبحبحه –

في الزيف وتجريف العقول

والدردَحَه في القول وتلوين الكلام

إحنا شعب ..

في عزّ ما مطحون في عيشُه – بمرجَحَه

دمعتُه تفلَق حجر – ضحكتُه – بتولِد نهار

شعب – رغمّ الطحن ..

في تفاصيل حياتُه باستمرار

رغم المكايد – مِن كبار أو مِن صغار

عُمرُه – ماجار علىَ أيّْ جار

شعب لَو فهَم المُعادله – صحّ –

واستقوىَ بتاريخه – وقوّتُه في وحدتُه

مين اللي يقدر في الحياه ..

عَن أيّْ حق يسكّتُه – ويضَلِّلُه عَن سِكّتُه

.. و يفتّتُه – ويشتّتُه !!

إحنا البلد اللي في كتاب ربّنا

بيه نستعين – وعدوّنا بمين استجار !! ؟

إحنا البلد اللي دمّ ولادها ..

متبعتَر علىَ ترابها.. عشان نفضل

– كعادتنا – كبار

ومهما زاد سِعر التِكَت ..

بنفسَّر المحنه – بنُكت – رغم المَرار !!

نلضُم الأحزان بخيط

– ونعلّقُه فْ ياقة جاكيت –

.. نخفيه معَ أوّل غُبار

.. ونعيد في كَرّة – شعب

معروف في المجَرّه بقوّته – ع الضحك

سِرّ مِن أسرار – تفَرُّد لُحمِتُه

.. في الجدّ باستنفار

ويسرسِب القلب اللي طافح شَكوِتُه ..

مِن نظرة الأغبيا – لصبرُه أو حكمتُه

.. نُكته مِن – آثار –  زمن الكورونا

.. واللي ما يضحك – حمار

.. واللي ما يفهم – حمار

***

شريف رستم