بقلم : نعيمه النطاح
ا ستاحشتكم ياشارعي مشتاقه
استاحشت حوش العز والطقطاقه
ياحوشنا تفكرتك
ياجنان بالعرصات ماقعمزنك
قداش يافيرانده فرشتك
ماحرها نار فرقتك حراقه
مخاطير خطرو عليا
ميعاد شاهي وخوت وامي البيه
كوني رزينه وباهيه يابنيه
وليام توا تعلمك لحداقه
استاحشت بوي الهيبه
تعنقيرته مع خزرته والطيبه
العالى وغالى كل شي يجيبه
ويطرّبك بكلام فيه رواقه
بكلام كله مساوى
بامثال حكمه مزينه بحكاوي
الغالي وبيي اللي وجيها ضاوى
فالريح من زيه يقوده سواقه
ستاحشتهم جيرانى
اللي ود ودي نشوفهم حقانى
ماهوش بشوارب بضرب معاني
تفكرتهم سبحت بالرقراقه
ستاحشتها الوسعايه
ببريلا وخويلتى ف حكايه
ونقيزتي وحبيل شدى معايا
من قال دنيا طبعها فراقه
يوم ما خطر طاريهم
دموع خاطري ياخوت بنعزيهم
تصاوير ويامات روحي فيهم
كيف حالكم ياونستى يارفاقه
ا ستاحشتكم ياشارعي مشتاقه
استاحشت حوش العز والطقطاقه
التعليقات مغلقة.