أبو العيال و طلبات المدارس
بقلم / مها عامر
أم العيال: شوفت يا أبو العيال الانبوبة غليت ازاي اترفعت مره واحده خمسين جنيه
أبو العيال: أيوه عرفت طبعا بس معدتش قادر اتكلم
أم العيال: وبعدين هنعمل إيه يا أبو العيال
أبو العيال: هنعمل إيه يعني هنقعد
نتكلم ونتكلم وبعدين نصحى بردو على حاجه تانيه غليت وهكذا وهكذا
أم العيال: ماشاء الله عليك يا أبو العيال انت بقيت منطقي وواقعي
أبو العيال: أو يائس أو مغلوب على امره
أم العيال: متعملش فى نفسك كده ياخويا وأنا من ناحيتي مش هطلب منك حاجه تانيه
أبو العيال: أصيله يا أم العيال
أبو العيال: أومال فين العيال ؟!!
أم العيال: والله معرف باين زهقوا وسابوا البيت
أبو العيال: بتقولي إيه يا أم العيال!!
أم العيال: ياخويا بهزر بقولك تعالى نروح يومين عند حماتي منها نغير جو ومنها تدعيلنا كام دعوه
أبو العيال: لأ بلاش دلوقتي
طيب تعالى نروح شقتنا اللي فى الساحل
أبو العيال: بذمتك يا أم العيال ده حال حد عنده شقه فى الساحل
أم العيال: أيوه كده اضحك وخليها على ربنا اه صح العيال خرجوا يشتروا شويه كشاكيل على شويه أقلام على شويه شربات
أبو العيال: ما الأقلام مرميه فى كل حته ولا الشربات ان مافى فرده زي التانيه يا عيني
أم العيال: تقصد اني بضيع الشربات
أبو العيال: لا أقصد العيال هما اللي مهملين
أم العيال: اوعى تنسى اللبن عشان نعمل شاى بلبن مع الكيك
أبو العيال: هو انتي عملتي الكيك
ام العيال لأ مستنيه اللبن وابقى هات عيش فينو و لانشون وجبنه رومي عشان السندوتشات
أبو العيال: أم العيال مش قولتى ماهتطلبيش حاجه !!!!
