منقول
لو مش متابعين أخبار الكوكب….
هاتوا كوباية الشاي بالنعناع علشان ناخد لفة فى الكوكب…!!
️ إسرائيل
عارفين المثل اللي بيقول إتلم تنتون على تنتن والإتنين أنتن من بعض…!!!
أهو ده اللي بيحصل دلوقتي بين اسرائيل و اوكرانيا
طب لو عايز تفهم اللي بيحصل تعالى وانا أقولك …
بلينكن وزير خارجية امريكا راح زار اوكرانيا وبعدها طلع على اسرائيل وطلب من إسرائيل انها تبعت كل الأسلحة اللي عندها فى المخازن اللي كانت بتحارب بيها فى ٧٣ مع مصر واسرائيل وافقت وبعتت لحد دلوقتي ٣٠٠ الف دانة مدفع ….
مش كده وبس ده بلينكن طلب من اسرائيل انها تبعت القبة الحديدية لأوكرانيا اللي هي تعتبر فخر الصناعة الإسرائيلية العسكرية واسرائيل قالت انها هتدرس الطلب….. يعني من الآخر هتبعتها
تقوم تحصل الإنتفاضة فى القدس والدنيا تتقلب فى غزة وتحصل عمليات ارهابية فى قلب القدس
وإسرائيل كده غصب عنها هتشغل القبة الحديدية عندها علشان تحمي تل أبيب ومش هتقدر تبعتها لأوكرانيا
شايفين اللعب إزاي….!!!
بالبلدي كده بوتين بيقول لإسرائيل انت جاي تساعد اوكرانيا ضدي طب كش ملك….!!
مش كده وبس ده أنا هنقلك الحرب داخل تل أبيب نفسها
إسرائيل تسكت …… ابدا !!!
راحت ضربت بعض المواقع العسكرية فى إيران علشان ايران بتساعد روسيا
وراحت إمبارح بعتت وزير الخارجية الإسرائيلي للسودان وقال إيه إحنا عايزين نفعل إتفاقية التطبيع والسلام مقابل السلام…..!!
اتفاقية تطبيع مين يا ابنها اللي جاي تفتكرها دلوقتي !!!
هيطلع واحد يقولي وإيه اللي دخل السودان فى الفيلم الهندي ده …!!!
وهي السودان ناقصة اصلا !!!
هقولك يا سيدي….
إسرائيل بتلعب دور شطرنج مع مصر دلوقتي على أعلى مستوى
إسرائيل عارفة ومتأكدة ان مفيش حجر بيتحرك فى غزة او فلسطين او فى القدس غير بإذن من مصر
فاسرائيل بتقول لمصر هتعملي قلق فى قلب القدس هعملك قلق تحت فى السودان
شوف يا صديقي….
مفيش حاجة بتحصل فى العالم ده صدفة
️ وعلى الناحية التانية من الكوكب
*روسيا*
بعد ما ألمانيا وافقت رسميا على إرسال الدبابات لأوكرانيا طلع بوتين إمبارح وقال….
لو كنتوا نسيتوا اللي جرا …. هاتوا الدفاتر تنقرا
واعتقد ان الالمان لسه منسيوش معركة ستالينجراد من ٨٠ سنة لما بعتوا الدبابات الألمانية علشان تحارب موسكو طبعا هما عارفين حصلهم إيه…!!
وراح خابط على المكتب اللي قدامه وقايل طب عليا الطلاق بالتلاته من ام ناتاشا لا دبابات المانيا ولا دبابات امريكا ولا كل سلاح الغرب يقدر علينا واللي عايز يجرب …. يقرب
️ وعلى الناحية التانية من الكوكب
*أمريكا*
الناس بقى خيبتها سبت وحد وامريكا خيبتها ما وردت على حد….
لسه راصدين منطاد صيني فوق البنتاجون بقاله كام شهر طاير حاير فوقه بيصور وبيسجل وبيتصنت على كل المناطق الحساسة…
والله قالوا كده ….. مناطق حساسة
الصراحة يعني انا مش عايز أفسر اكتر من كده
لا مش كده وبس دول متهمين الصين انها بتتجسس عليهم بمنطاد طبعا المنطاد لا بترصده رادارات ولا بترصده صواريخ
الصين تسكت…..ابدا !!!
طلعت الخارجية الصينية وقالت ….!!
منطاد مين والناس نايمين …!!!
لا النمرة غلط يا عماد
️ وعلى الناحية التانية من الكوكب
*الصين*
الصين بقى حذرت الفلبين وقالتلها ورحمة بوزا لو امريكا عملت عندك ٧ قواعد عسكرية لنسويكي بالأرض
مهو الاسبوع اللي فات امريكا عقدت اتفاقية مع الفلبين لإستخدام اراضيها عسكريا وانشاء ٧ قواعد عسكرية
ومن ساعتها الصينين بيتكوا ع السين للفلبين
مش كده وبس
ده فى إجتماع الآسيان اللي حصل فى اندونسيا كل الدول الآسيوية اللي شركت فى الإجتماع حذرت الفلبين وقالتلها احنا بنحذرك من الخطوة دي ومش عايزين قلق فى المنطقة و اللي بياكل على ضرسه بينفع نفسه
️ وعلى الناحية التانية من الكوكب
*إنجلترا*
على الله حكايتها وإضرابات عامة هي الأسوء في تاريخ الامبراطورية التي لا تغيب عنها الشمس
بس مش ده اللي لفت نظري فى الموضوع….
اللي لفت نظري ان الحكومة الانجليزية قررت تخفيض عدد الجيش الإنجليزي من ٧٥ ألف ل ٦٥ الف لتخفيض النفقات….. اه والنحمة زيمبقولك كده
بس مخدتش بالك من الرقم ٧٥ الف جندي هو قوام جيش امبراطورية بريطانيا….!!!
وحكموا به نص العالم فى وقت من الاوقات !!
ايوه حضرتك علشان هما مبيعتمدوش على جيشهم فى الحرب قد ما بيعتمدوا على الخونة فى كل بلد والجواسيس
️ وعلى الناحية التانية من الكوكب
*تركيا*
طلع رئيس وزاراء السويد وقال ان تركيا طلبت مننا حاجات لايمكن تلبيتها علشان توافق دخولنا النيتو
ياترى هي تركيا طلبت ولامؤاخذة ايه من السويد ..!!!
ده رئيس وزاراء السويد كان ناقص يقول ان اللي طلبته تركيا مننا يتهزله سبع سماوات
مش كده وبس ده كمان البنك المركزي التركي بيقول ان التضخم فى تركيا نزل من ٧٠٪ ل ٥٧٪ والاسعار هتنزل والدنيا هتبقى زبادي فى الخلاط
وعلى الناحية التانية من الكوكب
*العراق*
يا أهل العراااق هل رأيتم نعيما قط…..!!!
العراق صاحبة تاني أكبر مخزون نفط فى العالم عندهم مظاهرات علشان الدولار بقى ب ١٨٠٠ دينار عراقي
ايه ….. بتقول إيه قول تانى كده !!!
اه والله زيمبقولك كده الدولار بقى ب١٨٠٠ دينار عراقي
لو انتوا فاكرين ان فى وقت من الاوقات من تاريخ العراق كان الدينار العراقي ب دولار ونص
ساعتها برضه مكنش عاجب العراقيين وكانوا بيقولوا هو صدام بيودي البترول العراقي فين ده تلاقيه بياكله فى كرشه
هما هما نفس اللي بيقولوا دلوقتي هو السيسي بيودي الغاز فين وفين فلوسه
جامدة الديموقراطية الامريكية…… لاء جامدة اووي
️ وعلى الناحية التانية من الكوكب
*المغرب*
رئيس وزاراء المغرب قعد مع رئيس وزاراء إسبانيا واتفقوا ان العلاقة بينهم هتبق شيكس وكده
طبعا كلنا عارفين ان في عداء تاريخي بين اسبانيا والمغرب بسبب منطقة جبل طارق وجبهة البوليساريو اللي بتدعمها اسبانيا
️ وعلى الناحية التانية من الكوكب
*تحيا مصر*
وفى كوكب تحيا مصر ….
سكاي نيوز بتقول إن إحتياطي الدهب فى البنك المركزي بيرتفع للشهر التالت على التوالي لأرتفاعات غير مسبوقة وبتسأل هي ليه مصر بتزود رصيدها من أطنان الذهب !!!
مش كده وبس ده كمان الإحتياطي الاجنبي بيزيد كمان للشهر التالت
كمان فى كوكب تحيا مصر….
فى الوقت اللي كل بنوك العالم المركزية من امريكا لاوروبا رفعت فايدتها علشان تواجه التضخم وزيادة الاسعار….
طلع علينا البنك المركزي المصري إمبارح يقولنا ان ايرادتنا فى شهر يناير من قناة السويس حققت مليار دولار إلا شوية وده رقم عمره ما إتحقق فى عمرها وان تحويلات المصريين الخارجية قلت شوية وبقت ٦.٤ مليار دولار وان السياحة حققت ٤ مليار دولار وان العجز التجاري نزل من ١١ مليار ل٩ مليار وان التصدير زاد والإستيرا قل وأرقام كتير قالها البنك المركزي علشان يطمن الشعب المصري على الإقتصاد المصري
طب هو ليه البنك المركزي بيقول كده…!!!
ده من باب الشفافية وان الشعب المصري يعرف إحنا فين ووصلنا لفين وإيرادتنا ايه ومصاريفنا إيه
بس من وجهة نظري التي ليس لها قيمة على الإطلاق
البنك المركزي المصري والحكومة المصرية عملت زي الام المصرية اللي ولادها كل شوية يقولولها انتي بتصرفي على البيت ازاي وبتودي فلوسنا فين ؟؟!!
تقوم الام تقولهم والله البيت ماشي ببركة ربنا طب آدي مصادر دخلنا ومعانا قد كده كل شهر ومطلوب مننا مصاريف قد كده كل شهر فشدوا حيلكوا شوية وإشتغلوا علشان نزود دخلنا علشان نقدر نعيش كويسين ونحقق كل احلامنا وبتشارك الشعب فى كل معلومة
فدلوقتي يا حبيبي لو مش عاجبك العيشة اللي انت عايشها فى مصر قدامك حل من إتنين يا إما تعيش على القد وترضى بنصيبك يا إما تشتغل على نفسك وتزود دخلك ودخل الدولة وتعيش عيشة فل يا إما بقى تروح تعيش فى حتة تانية ومتقرفناش فى عيشتنا..
بس خد بالك ان الدنيا كلها مش زي ما انت متصور فى خيالك هتروح تغرف فلوس وترجع
كمان فى كوكب تحيا مصر….
هتلاقوا صور المدينة الصناعية الروسية فى منطقة قناة السويس الصناعية
بس اللي لفت نظري فى المخطط ان في مدينةكمان هتتبني فيها اسمها مدينة موسكو
طبعا المنطقة الصناعية الروسية فيها توطين للصناعت العسكرية الروسية والصناعات الثقيلة كمان
هو ده الفرق بين الشراكة المصرية الروسية والشراكة المصرية الامريكية
٣٠ سنه بنسمع عن الشراكة الامريكية المصرية اللي كانت كل صناعتها لتوطين مناديب المبيعات لشركاتها وتجميع وبس ومصانع الشيبسي والكراتيه والشيكولاته وكل انواع الترفيه
خد بالك ان الروس مبيهزروش
كمان فى كوكب تحيا مصر….
المدينة الصناعية الصينية تيدا….. ايوه هي اسمها تيدا
ودي هتكون أكبر مدينة صناعية صينية في أفريقيا والشرق الأوسط فى العين السخنة على مساحة ٧.٢ كم٢
والمدينة تيدا بيتعمل فيها صروحًا صناعية لكبرى العلامات الصينية في مجال صناعة المنسوجات و الفايبر جلاس و الألواح الجبسية و الطباعة و الكيماويات
كمان فى كوكب تحيا مصر….
من قدام أبو الهول وتحت سفح الأهرامات …
الكاتب الفرنسي الشهير رولان لومباردي رئيس تحرير موقع «لو ديالوج» الفرنسي ومؤلف كتاب «السيسي بونابرت مصر» بيهدي النسخة اللي اصطحبها معه في زيارته للقاهرة إلى الرئيس عبد الفتاح السيسي
السيسي وبيقول عنه هو بونابرت مصر
طبعا الراجل جاي يطبل لمصر مهو كان فى الامن المركزي …. معروفة
كفاية كده …. وتقعدوا بالعافية
وأعلم أن كل شجرة وكل وردة تُحدثك وتقول لك: ..
كُل ما تزرعه تحصده ..
فلا تزرع سُوى الحب …
الرومى
بيعايرونا بفقرنا……. بس انا مش هسكت
عبدالفتاح السيسى
*والسلام عليكم ورحمة الله وبركاته*
التعليقات مغلقة.