مالك ساكت يا قلمي
بقلم / ولاء زاويه
مالك ساكت يا قلمي.. مليت انا مالسكات
مانتاش موجوع لألمي.. ولا هزتك الاهات
ولا طيرت ويا حلمي.. و لا لملمت الشتات
كنت سلاحي و عَلَمي.. و لفرحي كتير حجات
تايهة يا قلمي الحروف.. و فقلبي الحزن نايح
و سكن جوايا خوف.. وتاهت مني الملامح
و ان حِجتك الظروف.. كداب و الكدب صايح
كنت ملاذي الشغوف.. طاب ليه من روحي رايح
نايمه يا قلمي الحياه.. و ساكته فيها المعاني
وهايمه يا قلبي فسماه .. احلام حايره تعاني
ده انا حلمي بات منتهاه .. انك تحاوطني تاني
و ماليش غيرك اتجاه.. يا درة فوف تاج زماني
ايوه يا قلمي يا نسيني .. ما لصوتي غيرك بديل
يا صديق ايام سنيني .. انت على وجودي الدليل
فرحي و المي و حنيني .. وثّقت ليهم دليل
و دويت لي جرحي و انيني .. و شفيت لي فكري العليل
من تاني حكتب و حكتب.. و بقلمي حفتح بيبان
و يا قلمي حخدك و نهرب.. و نعدي حد الزمان
نفتح و نرفع ونعرب.. للدنيا معاني الأمان
امْلي دوايتك و جرب .. ترقّص وتر الكمان
رجع للقلب روح.. شاهت فيها الاسامي
وانثر في الدنيا بوح.. يشرق فيه انسجامي
ده انت لروحي طروح.. بيدوب فيها اعتصامي
و اثاري بعد اما اروح .. و فخري و درعي ووسامي
التعليقات مغلقة.