عمرو سراج يكتب عن الشارع الوحيد الذى لم يغرق فى الإسكندرية
عمرو سراج يكتب عن الشارع الوحيد الذى لم يغرق فى الإسكندرية
ده إسمه شارع فؤاد… الشارع الوحيد الذى لم يغرق فى الإسكندرية…
كلنا عارفين ليه..
الشارع ده بيحكى القصة بإختصار..
قصة مصرالشارع ده لم يُبنى فى عهد الملك فؤاد…خالص!!
يبقى أكيد الخديوى اسماعيل..كان غاوي فشخرة و مبانى؟؟
لأ برضه!!
يبقى أكيد الحملة الفرنسية لما جم مصر و دخلوا اسكندرية الاول؟؟
لا وحياتك…مش بعيد نابليون يكون شرب قهوته الصبح هناك..
بس الشارع موجود قبل نابليون بكتير!!!
يبقى عمرو بن العاص!!!
لأ…عمرو بن العاص ملوش علاقة بالشارع!!!
ألاه؟؟؟؟ الرومان؟؟؟
لأ!!!
البطالمة!
بطليموس!!
آه و الله زي ما بأقولك كده…
شارع فؤاد اتبنى سنة ٣٣١ قبل الميلاد
على يد المهندس الإغريقى مؤسس الاسكندرية::
دينوقراطيس!!
على تبة عالية فى اسكندرية!!!
حتى المكان تم اختياره بعناية..
و جم الرومان عملوا صهريج لتجميع مياة الامطار–لسة موجود –
تحت الشارع فى جنينة الشلالات الحالية!!! و مجارى مائية لتوصيل المياة الى البيوت صيفا و شتاءا
يعنى المواطن السكندرى كان عنده مية شرب نقية بتوصل لغاية بيته يوم ما المسيح اتولد
ولمعلوماتكم::
اسكندرية كانت المدينة الوحيدة فى العالم اللى لها جنسية
يعنى مصرى ماشي..
انما مصرى اسكندرانى فأنت شخص درجة اولى
(و يمكن يكون ده سبب ان الاسكندرانية شايفين نفسهم شوية زيادة الى الآن )..
و ممنوع يبات جوه اسكندرية زمان غير سكانها فقط..
الاغراب يطلعوا برة سور المدينة يباتوا..
من ٣٣١ قبل الميلاد قاومت الاسكندرية كل محاولات طمسها…
من اجمل بلاد الارض ايام البطالمة و الرومان..
لمدينة ذات طابع متميز مختلف ايام حكم الخلافات الإسلامية..
لعودة لتصدر الواجهة بقوة مع عصر الأسرة العلوية…
مدينة الاسكندر الأكبر و كليوباترا و اوكتافيوس و هيباتيا و اقليدس و عبدالله النديم و محمد كريم و نبوية موسي…
مدينة حسن فتحى اعظم مهندسين مصر و كفافيس و ديميس روسوس و شادى عبد السلام و يوسف شاهين..
استسلمت اليوم بعد ٢٥٠٠ سنة لجحافل الجهل و الغوغاء و انعدام المعرفة و بطش القوة…
و يبقى فقط شارع فؤاد قائما منتصبا يحافظ للإسكندرية على بقية باقية من كرامة و تاريخ
التعليقات مغلقة.