بقلم _ مها عامر
أم العيال: صباح الخير يا أبو العيال عملتلك الفطار اللي بتحبه بطاطس محمره وبيض مقلي ب حبه البركه وفول بالزيت الحار
أبو العيال: صباح الخيرات بس احنا معندناش زيت حار
أم العيال: لأ ما انا بعمل ايه بحط شويه زيت واضربهم مع كام قرن شطه فى شفشق الخلاط يبقى زيت حار
أبو العيال: فكره بردو انتي عايزه حاجه النهارده ؟!مش عندك فراخ ولوبيا
أم العيال: أنا عايزه دسته أقلام ازرق وزيهم أسود وزيهم أخضر وزيهم أحمر
أبو العيال: حيلك حيلك كل دول إحنا هنفتح مكتبه
أم العيال: كل سنه وإنت طيب داخلين على المدارس وأربع خمس كشاكيل كبار سلك ومناديل وباقى الحاجات موجوده ولبس المدرسه عامله حسابه والشنط موجوده من السنه اللي فاتت
أبو العيال: انتى عايزه المناديل ليه هو احنا هنعيط على دخول المدارس
أم العيال: لأ بس عشان البرد و الشتا المهم هو بس فيه طلب واحد
أبو العيال: عنيا
أم العيال: أنا عايزه جزمه وشنطه والشراب موجود عندي
أبو العيال: اديني الصبر من عندك يارب ليه رايحه المدرسه انتي كمان!!
