تقرير _ عمرو سراج
ابطال يجهلهم التاريخ و غاب عنهم الاعلام
لواء بحري محمد فوزى اسماعيل حبيب ( رحمة الله عليه )
رجل من اخلص الرجال وبطل من اشجع الابطال شارك فى جميع الحروب التى خاضتها مصر ( /56/67/73)
وكذلك فى جميع مراحل الاستعداد لتلك الحروب وحصل على العديد من الاوسمه والنياشين العسكريه رئيس اركان سلاح
لانشات الطوربيد بالقوات البحرية فى حرب 1973
من كتباتة عن اهم معركة في تاريخ حياتة
ضرب بالوظة و رمناة 8 نوفمبر 1969
في أواخر 1969 أو أول 1970 في الإسكندرية حوالى الساعة 10.30 بالليل كنت في فرح ظابط في البحرية وانا قاعد فى أمان الله لقيت عسكرى من قيادة القوات البحرية جايلى في الفرح وبيقولى قائد القوات البحرية عايزك دلوقتى وكنت ساعتها برتبة رائد ومسئول عن لانشات الطوربيد بقاعدة الإسكندرية البحرية ومن مفارقات القدر إنى ساعتها كنت أقدم رتبة في هذا السلاح على مستوى البحرية كلها المهم رحت فى الحال لقيت أقدم قائد في سلاح المدمرات ونظيره في لانشات الصواريخ وأقدم قائد فى سلاح المدفعية الساحلية وكمان رئيس أركان القوات البحرية ـ بالبلدى كله موجود برابطة المعلم ـ وبدأ قائد القوات البحرية ساعتها يطلب من كل واحد فينا تصور لضرب منطقة استراتيجية فى أرضنا المحتلة ـ سيناء ـ تسمى رمانة وبالوظة وطلعت الخرائط وبدأ كل واحد من الموجودين يعمل تصور لدوره فى هذا الهجوم فيما يخص السلاح بتاعه ولما الضباط خلص كل منهم توضيح دور سلاحه فى هذه الضربة فوجئوا بقائد القوات بيقول كل اللى قلتوه هاتنفذوه عملى ـ بدون الخبراء الروس ما يعرفوا ـ وأهلوا نفسكم لكده والتنفيذ خلال 48 ساعة من دلوقتى
ببص فى الساعة بعد ما خلصنا لقيتها 4.30 صباحا وأصعب احساس عدا عليا ساعتها لما دخلت البيت وقلت لمراتى صحى البنتين انا عايزهم يناموا فى حضنى
مراتى اتفاجئت بكلام أول مرة تسمعه ومش توقيته احنا كنا فجر يوم جمعه تقولى دول نايمين صممت انهم يناموا فى حضنى وقعدت ابوس فى كل واحدة حاسس انى ممكن ماشوفهمش تانى ومراتى تقولى في ايه أقلها مفيش حاجة بناتى وواحشنى
صليت الفجر ونمت قمت الساعة 9 ونازل ومفهم مراتى انى رايح يومين اسوان لتأمين السد العالى وانا فى الحقيقة رايح بورسعيد فى عربية قائد القوات البحرية ومعايا قائد المدمرة المشتركة فى العملية ومفيش جنس مخلوق يعرف عننا أى حاجة صلينا فى السكة ووصلنا قاعدة بورسعيد الساعة 2 مساء
افتكرونى وانا وزميلى فى أول الأمر جايين تفتيش مفاجىء سألوا القاعدة فى اسكندرية عن سبب زيارتنا المفاجىء لبورسعيد قالولهم انهم مايعرفوش عننا حاجة وكملت لما عرفوا من ظابط عظيم قاعدة اسكندرية انى غياب عن القاعدة والبوليس الحربى راحلى البيت
ساعتها لقيت قائد قاعدة بورسعيد بيقولى انت جاى تعمل انقلاب عسكرى هنا فضحكت وقلتله انا هنا بتكليف من قائد القوات فقالى ده البوليس الحربى بيدور عليك فقلتله كلم قائد القوات البحرية وسعادتك تتأكد
حصلت المكالمة والراجل اتأكد من كلامى بس معرفش برضه سبب وجودى .
الساعة 4 م القائد بتاع بورسعيد روح بيته . بعدها بساعة واحدة لقانى بكلمه فى بيته وبقوله قائد القوات بيقولك تعالى القاعدة دلوقتى
لما وصل اديته ظرف متشمع بالشمع الأحمر فتحه لقى تفاصيل العملية كاملة ، قال طب ليه مقولتليش من الأول وانا عندى ناس أجازات ننفذ ازاى دلوقتى قلتله هانفذ بالموجود .
الساعة 7 م قائد المدفعية الساحلية حضر واستلم نفس المظروف وقلتله هاتضرب بالأفراد اللى عندك
الساعة 10 بالليل طلعت بأربع لانشات طوربيد وانا ساعتها اقدم رتبة فى هذا السلاح وفهمت الظباط اللى معايا ان ده تدريب ولما بعدنا عن القاعدة قلتلهم ده مش تدريب وده عملية حقيقية
وللعلم لانشات الطوربيد فى الحروب تعتبر من الفدائيين لأن دورها بيجبرها انها تكون فى أقرب نقطة للعدو عشان هى تحقق اصابة مؤثرة لأهدافها وكان دورها فى العملية ده أجهاض اى تحركات بحرية ايا كان شكل او مسمى السفينة المعادية حتى تقوم المدمرة المصرية باطلاق كامل نيرانها
كان بينى وبين الشط اليهودى 2 كيلومتر أو اقل وكنت بحمى المدمرة اللى بينى وبينها 8 كيلومتر تقريبا يعنى المدمرة كانت بتضرب من على بعد 10 أو 11 كيلو تقريبا
المدفعية الساحلية قصت الشريط وبدأت الضرب المخادع بقصد تشتيت انظارهم عننا وقبل ما يخلص الضرب المدمرة بدأت فى الطحن وليس الضرب 20 دقيقة ضرب بلا رحمة وانفجارات تفرح
خلصنا وراجعين والحمد لله وكنا فى ليله مفيهاش قمر ملحقناش نتهنى طلعت ورانا 16 طيارة اسرائلية وقعدوا يرموا فليرز ( كشافات للإضاءة الواحد منها يضىء بقوة 10000 شمعة ) طبعا كنا ساعتها بنجرى فى البحر فى 100 اتجاه بأقصى سرعات عشان ماتشافش وهما يرموا قنابل عميانى مش شايفين ربنا عماهم ، المهم وصلنا بورسعيد الفجر ومفيش اصابة أو خدش فى واحد فينا لقناهم بيضربوا نار من الفرح وبورسعيد كلها على رجل والناس فى الشارع الفرحة مش سايعاها خدنا عربية من القاعدة وطيران على اسكندرية ، واحنا فى السكة الراديو ذاع اخبار العملية اللى عملناها
لما روحت مراتى قالتلى انا عرفت كنت واخد البنات فى خضنك ليه
التعليقات مغلقة.