العب باليه ..
بقلم / ولاء زاويه
انا كل حاجه و عكسها.. انا كل كلمة و ضدها
انا الجريئة صادقة وبريئة شمس الحقيقة فزهوها
حره و قويه صاحبة قضية وعنيده ما تسيب حقها
و انا الضعيفه فضلمه عنيفة بتداري قصة كذبها
فاقدة الهوية بايعه القضيه إرادتها زاغت منََها
انا كل حاجه و عكسها.. انا كل كلمة وضدها
انا الطيابة و صوت الربابة و حب الصبابه و عشقها
نسمة ليالي وانوار تلالي وعروسه طايره بفرْحها
و انا الكآبه و غلب الغلابة و عتمة ضبابه و شرها
حزني تلالي يميني و شمالي مخنوقه فارقت د ربها
انا كل حاجه و عكسها.. انا كل كلمة و ضدها
هاديه وراسيه حنيه ناسيه طعم الاسية و مرها
عاقله و ناضجة و دماغي سابقة سنيني و ايام عمرها
طفوليه حايره جواها جايره كراكيب مدينة في حربها
مجنونه اسيه و بنشوة حاسيه فنجان شماتة فسرها
انا كل حاجه و عكسها.. انا كل كلمة و ضدها
صديقه جدعة وفي الشدة رادعة لقشه تلمس صحبها
و حبيبه هايمه و قريبه دايمه وصالها روحها فاهلها
قلابة بايعه هرابه ضايعه من ايد صديق بتشدها
غداره جافه مناعة عافه عن شوق حبيب محتاج لها
انا كل حاجه و عكسها.. انا كل كلمة و ضدها
طاقة و نشيطة حوارات طليقة ، فتحالي قارة في قلبها
خفة و لطافه رقه وظرافه و شياكه حتى في مشيها
لكن عبيطه باحساس لقيطه قافلة الدولاب على نفسها
و سعات عنيفة و ممكن مخيفة و سعات بتكره ضلها
انا كل حاجه و عكسها… انا كل كلمه و ضدها
طاب ليه كده !! ليه عامله انا بالشكل ده !!
طاب هل ده طبع !! عادي انا ابقي سبع ضبع !!
ولا من البدايه نبع !! لربكة طفولة و لغزها..
انا كل حاجه و عكسها.. انا كل كلمة و ضدها.. طاب اعمل ايه !!
ياريت كده حد يجاوبني اعمل ايه !!
حاسه اني اميره عايشه ورا البديه..
او اني بياعة سمك في قصر بيه..
هل ده هبل !! ولا هطل !!
ولا ده يمكن الجنان اللي ماحدش سمع عليه..
طاب اكمل عادي !! ولا الحق نفسي عند اسمه ايه !!
طاب اقولكم…………… العب باليه
التعليقات مغلقة.