بقلم _ مها عامر
أم العيال: بقولك يا أبو العيال الكحك والبسكوت خلصوا والعيال عايزين كمان
أبو العيال: اجيب من نفس النوع ولا حاجه تانيه
أم العيال: لأ نفس النوع وهات قطايف عشان خلاص رمضان خلص
أبو العيال: واجيب كنافه كمان وايه تاني يا أم العيال قوليهم كلهم دفعه واحده عشان اجيب الحاجه واخلص
أم العيال: انا مش بفتكر كل الحاجه وهو يعني السوق بعيد ولا هتسافر بلد تانيه ماهو كلهم جمبنا
أبو العيال: ايوه ماشي بس انا كبرت وبتعب من كتر المشاوير
أم العيال: ابقى خد هاني معاك وعرفهم عشان يريحك من بعض المشاوير وبعدين انا مريحاك من شرى الهدوم وترجعيها عشان لو فيها حاجه مش مظبوط وشرى الكوتشات والشنط وتوك الشعر والشربات والطرح والسجاد والمفارش
أبو العيال: هو انتي فتحتي محل وانا معرفش ايه كل ده!!!
أم العيال: مش كل شويه بعمل فى البيت تغيير بس انا سياستي دعونا نعمل فى صمت أما انت يا أبو العيال تعمل حكايه على كل مشوار كأنك طالع الفضاء
أبو العيال: انا عارف اني مش هخلص لا من الكلام ولا من الطلبات تصدقي بالله
أم العيال: لا اله الا الله
أبو العيال: أنا كل عيد بحط ايدي على قلبي
أم العيال: واخبار النبض ايه؟
أبو العيال: اجيب ايه تاني
أم العيال: وأنا لسه هفتكر بعد كلامك ده هات دول وربنا يسهل ولو افتكرت هكلمك فون
أبو العيال: فاصل شحن
أم العيال: هاته اشحنه
أبو العيال: الشحن ضايع معرفش فين
أم العيال: افتكرت هات فول سوداني وترمس وحاجه ساقعه وتيجي بسرعه
