بقلم _ مها عامر
أم العيال: عارف يا أبو العيال من بعد ما اكلت فسيخ فى العيد وفى شم النسيم معتش هاكله الا السنه الجايه
أبو العيال: طيب كويس يا أم العيال لانه بردو مش صحي واحنا كبرنا وتعبنا
أم العيال: ماله السن وماله الأكل يا أبو العيال
أبو العيال: مالوش
أم العيال: الفاكهه السنه دي غاليه اوي
أبو العيال: يا أم العيال متشغليش نفسك باللي هيغلى واللي هيرخص
أم العيال: والله يا أبو العيال بحب السلام النفسي اللي انت فيه ده
أبو العيال: بمناسبة السلام النفسي اعمليلي كوبايه شاى السلام و ياريت بقى معاه سندوتش جبنه قديمه وخيار وطماطم و طحينه
أم العيال: تحب يكون معاه بيض اوملت
أبو العيال: ياريت
أم العيال: و ايه رأيك معاهم كمان شويه بطاطس مقليه
أبو العيال: ده كده يبقى تمام
أم العيال: و يا سلام بقى شويه بتنجان
أبو العيال: بس ميبقاش تعب عليك
ام العيال: لا ابدا
أبو العيال: بس كده ميبقاش صحي
أم العيال: يا أبو العيال متشغلش بالك بالصحي ومش صحي
أبو العيال: على رأيك
أم العيال: عارف كل الحاجات اللي انت وانا قولنا عليها للعشا
أبو العيال: ايوه يا أم العيال مالها
أم العيال: نفسي فيها بس مش قادره اقوم اعملها نفسي تجيلي جاهزه لاني جعانه جدا
ابو العيال: !!!!!!
