بقلم مها عامر
أبو العيال: عايزين ناكل حاجه حلوه
أم العيال: اعملكم مهلبيه
أبو العيال: لأ
أم العيال: اعملكم شعريه بالزبيب وجوز الهند
أبو العيال: لأ
أم العيال: اعملكم بقلاوة
أبو العيال: لأ
أم العيال: اعمل جلاش
أبو العيال: اه ياريت
أم العيال: طيب حد يروح يجيب لفتين جلاش
أبو العيال: روح يا هاني هات جلاش
هاني: مش فاضي ورايا مذاكره
أم العيال: ما تروح انت يا أبو العيال
أبو العيال: اعميلي مكرونه باللبن صحي ومفيد
أم العيال: لأ مش جايه على نفسي
هنيه: انا هعمل شاي باللبن وسندوتش جبنه رومي اعملكم معايا
أبو العيال: يااااااريت
أم العيال: يعني خلاص محدش منكم عايز يخرج الجو مش برد للدرجادي
أبو العيال: لأ مش قصه برد بس الواحد ملوش مزاج يخرج ما انا كنت خارج كنت قولي
أم العيال: ما انا مكنش جاي على بالي حاجه حلوه ولا حاجة حادقة
العيال: لأ احنا عايزين حاجه حلوه كل يوم معموله فى البيت أو جاهزه مش فارقه المهم نحلي
أبو العيال وأم العيال: ربنا يحلي أيامكم قولوا امين
صحيح ربنا يحلي أيامنا وايام حبايبنا وكل اللي حاببنا
