أبو العيال والمناسبات … بقلم مها عامر 

أبو العيال والمناسبات … بقلم مها عامر 

أم العيال: أبو العيال إحنا رايحين فرح يوم الخميس

أبو العيال: فرح مين يا ترى ؟!!

أم العيال: بنت أم حمدي جارتنا

أبو العيال: ألف مبروك وربنا يتمم بخير وعقبال حمدي

أم العيال: خد هنا انت رايح فين!!

أبو العيال: رايح البلكونه أشرب الشاي 

أم العيال: مش لما نكمل كلامنا 

أبو العيال: كلام ايه ؟!

أم العيال: مش بقولك عندنا فرح 

أبو العيال: يعني اعمل ايه؟؟

أم العيال: يعني عايزين فلوس نشتري هدوم للفرح

أبو العيال: خدي من فلوس الجمعيه 

أم العيال: ما الفلوس كلها راحت فى المصيف انت نسيت

أبو العيال: وانتي نسيتي ان عندنا مصاريف كتيره الشهر اللي جاي

 عشان المدارس

أم العيال: لأ مش ناسيه ولا حاجه بس خلينا دلوقتي فى الفرح 

أبو العيال: لما نبقى نقبض هديلك الفلوس كلها وابقى انتي اتصرفي

أم العيال: ماشي طيب هات اللى معاك دلوقتي

أبو العيال: خدي الفكه كلها اللى فى جيبي

أم العيال: لأ انا عايزة اللي فى المحفظة