بقلم مها عامر
أم العيال: يا أبو العيال تعالى لما اقولك
أبو العيال: نعم خير يارب استر
أم العيال: اتفقنا فى رحله كده يوم ع السريع نروح نشوف البحر ونشم يود وناخد اكل فى العمود والرحله مع الحاج داود
أبو العيال: خلاص اعرفي اليوم والساعه وهنكون موجودين
أبو العيال: وأنا هروح اكتب لسته الطلبات وادور على التُرمس والشنط وشباشب البحر
أبو العيال: بلاش ناخد حاجات كتير ونشتري من هناك
أم العيال: لأ لازم الشيل دي الراعي الرسمي للسفر
أم العيال: هناخد ازايز مايه وحاجه ساقعه سندوتشات كفته وبطاطس محمره والباقي هنشتريه
أبو العيال: كل سنه تشيلينا شيل كتير ونرجع بالباقي
أم العيال: عشان بيبقى عندي اكل نقعد يومين
أبو العيال: يوم زي يومين عشان نرجع بيتنا نرتاح
أم العيال: احنا مش تعبانين انت اللي مش مرتاح
أبو العيال: خلاص نقعد يومين لما اشوف ازاي هرتاح
أم العيال: احنا اللي هنقوله تاني ليه هنعيده ونزيده ماخلاص قولنا واتكلمنا وهنروح هنروح لا تراجع ولا استسلام
أبو العيال: حيلك حيلك هو احنا فى حرب
أم العيال: وانا قررت الانتصار
انا معايا جيش
أبو العيال: وأنا معايا السلاح
أم العيال: سلاح ايه ان شاء الله؟!!
أبو العيال: الفلوس طبعا
أم العيال: والله انت طيب يا أبو العيال الفلوس معايا بقالها اكتر من شهر وكملت عليها كمان
أبو العيال: ازاي ده انا حاططهم فى مكان الجن نفسه ميعرفش يوصلهم !!
أم العيال: جن ايه يا أبو العيال اللي ميعرفش يوصلهم ده اى حد ماشي فى الشارع يعرف هم فين انت حاططهم فى الدولاب بتاعك تحت هدومك لو عايز تخبي فلوس صحيح ابقى قولي وانا اعرفك مكان محدش يعرف يوصله الا انا
