الشاعر جمعة محى الدين
ينفع كده
هو كان فى حبيبين زينا
ينفع كده
بعد ما كان بيتحلف بحبنا
نتغير و نتحير فى مشاعرنا
و لا بقىٰ فى ثقة فى بعضنا
تاهت وعودنا وأحلام عمرنا
و الحب اللى كان مالى قلبنا
من غير ما نِحِس بقينا أغراب
و لا بنعمل لبعض حساب
هو أنا و الا أنت اللى كداب
مين فينا اللى ما صانش العهد
مستغرب نفسى و مستغربك
و كأن لا تعرفنى و لا أعرفك
مش عارف أنا و لا متصورك
هتعرف أيه كان سبب البُعد
الغلاوة إتحولت لقساوة
و بطلنا نتفاهم بهداوة
و الغلط بِـنِنَقِيه نقاوة
و بِعِدنا بُعد السما و الأرض
- إزاى قلبين كانوا إتواعدوا
يتحوِلوا لأغراب يتباعدوا
نِسُوا كل حاجة و إتفارقوا
و يبقوا زكرى حزينة لبعض
