دينا ماهر .. تكشف خبايا قلب طاهر

الأمان النفسي ..

مش مجرّد شعور بالراحة في وجود انسان بتحبه ،ولا هو مجرد حِلم بيتحقق مع حد بيحبك ، ولا هو احساس بيتولد مع الوقت والقُرب من حد قادر يطمّنك وتطمّن بيه …

الأمان أكبر من كده بكتير جداً …الأمان  إني أتصرّف وأنا كُلّي يقين إني ” أمانة ” بين ايديك ، إنّي أكون متأكدة إني مهما شُفت وقابلت ناس  هافضل أحسّ إني وَطن مُحتَلّ لحد ما تظهر وقتها بس هاستشعر إني فعلاً جوّا وطني الحقيقي …وإن كل معالم الغُربة جوايا مالهاش مكان …

لأن وقتها هاعتبرك إنت المكان والأهل والصُحاب والحبايب ….

 اهداءك ليا شعور الأمان هو بمثابة اهداءك لي ” الحياة”..

الأمان النفسي ..

مش معناه بس إني أكون على راحتي في عفويتي معاك كلاماً وأفعالاً ،لاء ده كمان إني في الغياب عارف وواثق إني مالي مَطرحي كويس ومكانتي عندك بخير، و اخلاصك بخير …

الأمان الحقيقي إني أجمع كل ثقة الدنيا وأضعها فيك …فَـ ما تخذلنيش ولا تستغل ده كَـ نقطة ضعف …

الأمان النفسي إنك فعلاً تاخد  مشاعري وخوفي وأخطائي وصدقي وطفولتي وغضبي وحُزني  وثقتي تحت جناحك ،

الأهم من ده كله إنك تراعي ربنا في علاقتي بيك …..

و ده أسمى وأهمّ وأصدق معنى للأمان النفسي .

دينا ماهر

إعلامية – المنصورة