كتَبَت الإعلامية القديرة جيهان منصور هذا السؤال بذكاء ومهنيّة علىَ صفحتها الخاصة Facebook .. وأجابت عليه بتلقائية ومصداقية واحترافيّة إعلامية ، قالت : لمَّا يتم الهجوم عليه بكثافة مُمنهجة من بعض من ظنّوا أنهم احتكروا الدراما الدينية والتاريخية لغياب نجوم مصر عن هذا النوع من الفن في الفترة السابقة.
عودة مصر مُرعبة لبعضهم، تعرف ليه؟ عشان الفن المصري تاريخ طويل وصل للعالمية ولو ذكرنا افلام تاريخية زي “الناصر صلاح الدين” و “المصير” وكل ابداعات الراحل الكبير #يوسف_شاهين التاريخية قبل ما البعض يحاول بعدها ب 50 سنة يعمل مسلسل تاريخي مُحنّط ، دمّه تقيل ولا دبلجة صوتية لمسلسلات تركية بلغتهم العامية!
عودة مصر القوية للدراما التاريخية الدينية بمسلسل #رسالة_الإمام ضايقت البعض خاصة ان المسلسل فيه مجهود كبير جدا وانتاج ضخم وتصوير واخراج واضاءة ولغة ومراجعة الازهر الشريف والبطل هو نجم مصري كبير #خالد_النبوي، عشان كده الموضوع تقيل على قلبهم أوي!
يا جماعة خليكم انتم في سبّوبة الدبلجة الصوتية للمسلسلات التركية! واتركوا التاريخي والديني لمصر عشان احنا عندنا اكتر من 100 سنة فن، واحنا بلد الأزهر الشريف منارة الإسلام في العالم!
مصر على مدى التاريخ بترحَّب بالأشقاء الفنانين العرب عندنا وكل نجوم العالم العربي شهرتهم في مصر – سرّ كبير- لوصولهم لكل العالم العربي وده لأن مصر ذوَّاقة للفن والأدب وهوليوود الشرق من 100 سنة.
التعليقات مغلقة.