ام العيال: أبو العيال ابقى هات لينا وانت جاي حلويات عشان نحتفل بالتوقيت الجديد
أبو العيال: ليه هو التوقيت الجديد كمان بقى مناسبه نحتفل بيها
ام العيال: لأ يا أبو العيال عشان أنا والعيال أجازه
أبو العيال: لأ أنا من النجمه هبقى فى الشغل
أم العيال: خلاص صلح فرن البوتجاز وأنا أعمل كيكه أو جلاش أو بسبوسه
أبو العيال: خلاص أجيب لكم إيه
أم العيال: أسأل ولادك انا كل الحلويات بحبها وانت برده
أبو العيال: يا هاني يا هنيه عايزين إيه من برا ؟! هما العيال فين !!!
أم العيال: دول بعيد عنك حاطين السماعات فى ودنهم الاتنين وأفضل انده و أهاتي ولا حد يسمعني
أبو العيال: طيب وانا هفضل انده و أهاتي زيك انا عايز اخلص
أم العيال: أنا من يوم ما عرفتك وانت عايز تخلص تخلص من إيه يا ابو العيال !!!
أبو العيال: اخلص من المشاوير والطلبات واجي ارتاح مع اني عارف برده مش هرتاح
أم العيال: بتقول إيه بصوت واطي
أبو العيال: دي كحه من تغيير الجو برد حر شمس
هانى و هنيه: عايز حاجه يا بابا ؟
أبو العيال: انتم فين دايما مستخبين
يخرب بيت النت على السماعات
العيال: أنتم اللي مش مسايرين العصر انتم قُدام اوي والدنيا اتطورت
أبو العيال: المهم عايزين إيه من الحلويات؟
العيال: عايزين تورته
أبو العيال: ليه هو إحنا عندنا عيد ميلاد !!
العيال: عيد ميلاد السماعات بقالها سنه معانا
أبو العيال: الواحد مش هيجيله جلطه من قليل
أم العيال: أبو العيال
أبو العيال: عايزه إيه تاني يا أم العيال ؟!
أم العيال: انت دايما تنسى العيش الفينو
أبو العيال: أنا هجيب كيزر
أم العيال: خلاص يبقى كيزر وعيش فينو
أبو العيال: أنا كل لما اروح اجيب يقولي لسه عشر دقايق وأفضل واقف بالنص ساعه أنا كبرت يا أم العيال ارحموني
أم العيال: ربنا يرحمنا جميعا يارب
التعليقات مغلقة.